CF DFI Wiki 9 Te Whakamātautau!!!

 GOOGLE  Edcuator Level 1

E Hika mā!  Wiriwiri katoa ana aku pona ki te whakamātautau i tēnei rā.  Heoi anō, pai tū, pai hinga, i hoea tonutia e ahau tōku waka.  Ahakoa kīhai i eke i te whakamātautau nei, ka mahia anōhia a ngā wiki e tū mai nei.  Nā reira, ka pōkaihia ōku matimati me ōku waewae mō taku tuponotanga tuarua, me kī!  E kore a muri e hokia, heoi anō, ka hoki ahau ki te kōrero a taku kuia, ko te karanga tuatahi mō te tangata, ko te mea tuarua..., nā ka mutu ana kōrero i konei.  E mārama ana ahau ināianei, kua mau hoki taku iro. (Pea)  He taonga nui te whakarite, waimarie he kāinga rua tōku.

Kote tikanga ia, ka whakapirihia taku tiwhikete me taku tohu ki te whārangi whakamutunga o tēnei rangitaki, heoi anō.  Ko te āhua nei, me haere tonu kia mutu (Kaua kia oti) rā anō, kia tika rā anō aku mahi, ka whakapirihia aku tohu!

Heoi anō, hei akiaki anō i te tangata e whakaaro ana ki te ruku ki ēnei momo wānanga, kia kaua ia e pōhēhē mā te whakamātautau anake e eke ai ia ki te taumata.  Ehara i te mea i hangaia a Roma i te rangi kotahi!  

E mihi ana ki ōku pia mirumiru, nā rātou anō ahau i whakakata, i whakawhanaunga mai ki ahau, otiia ki a tātou katoa.  Mei kore ake ko koutou!  Ki a koe hoki Makaore, tēnā hoki koutou ko Vicky mā i whakapau kaha, i whakatange rīaka, i whakaheke werawera i ngā wiki e iwa kua hori.

Hei whakatepe ake, me mihi tonu ka tika ki te turuhi Manaiakalani, kua hia tau koutou e kōkiri ana i tēnei kaupapa nui taioreore mā te iwi.  E kore rawa te puna mihimihi e mimiti nei ki a koutou.  Ā tērā atu wiki ahau, whakapirihia ai aku tohu!  Ki te hoe.