CF DFI Wiki 6 Leading Learning with Class Sites

Te whakawhānui, te whakawhāiti rānei i tā tō kura paetuku ki ngā kaupapa matua kia rapu pai ai te tangata i tāna e hiahiatia ana.

Ubiquitous - Koia te kupu hōu i akohia i tēnei o ngā wānanga.  Kei te horopaki hoki tōna whakamahi, tōna tikanga me kī, engari, he kupu kāore anō kia taka ki ōku taringa.

Kua whakahāngaihia tēnei kupu, tēnei āhuatanga ki te āhua o tā mātou paetukutuku.  Nā, i taku kitenga atu i te paetukutuku o Caleb Murray, ka taka te kapa, ka mārama pai ahau he aha tēnei mea te 'ubiquitous'.  Nā ēnei kupu akiaki, ka tīmata ahau ki te whakamahere i tētehi atu whārangi akomanga hei tāpiri atu ki te pae tukutuku o te kura.  Taihoa ake e kitea ai tōna rerekētanga.

He nui tonu ngā āhuatanga hei whakatika i mua tonu i te tūwheratanga o tēnei pae tukutuku ki te whānau.  Ko te whakapoapoa i ngā kaimahi ki te whāngai i te pae tētehi āhuatanga atu anō, heoi anō, ko te mea pai, he oranga kei roto!  He oranga mō te tamaiti, mō te whānau me te iwi.

Nā, hei tāpiri atu, he rawe te arohaehae, te tuku whakaaro me te pānui i ngā pae tukutuku a kura kē atu.  Kei te kitea anōhia, kei raro kē mātou e pūtu ana mō te whakarite pae tukutuku.  Arā noa atu te tini o ngā kura e hīkoi tōtika ana i roto i te ao matihiko nei.

Hoki atu, hoki atu aku mihi ki a Manaiakalani, ki a Dorothy mā, nā rātou tēnei ara i whakatakoto ki mua i te aroaro hei painga mō te iwi.  Kei mua e haere ana.  Heoi anō, tā te kāwanatanga me āna kore whai take - e Hika, hoatu kē te mana matihiko ki te kāhui o Manaiakalani!